156 ఓ బుల్లి కథ -- నైట్ అవుట్ ఇన్ మెన్హాటన్ - 2019

దివాలీ వెళ్ళి దాదాపు రెండునెలలవుతోంది, ఇప్పుడు దాన్ని గురించి వ్రాస్తున్నాడేమిటా అని అనుకుంటున్నారా. వ్రాయకుండా ఉండటానికి ప్రయత్నించాను గానీ మనస్సు ఒప్పుకోవటల్లేదు. ఇది పూర్తి అయ్యేదాకా  ఇంకొక  విషయం గురించి వ్రాయలేక పోతున్నాను. దానినే mental block అంటారల్లే ఉంది.

అసలు దీపావళి, అంటే దీపాల వరస, దివాలీ గ ఎల్లా మారిందో నాకు అర్ధం కాదు. ఒకటి మాత్రం నిజం "దివాలీ" అంటే అమెరికన్స్ కి తెలుస్తుంది కానీ దీపావళి అంటే తెలియటం కష్టమే.

అమెరికాలో రెండు ముఖ్య పండగలు. ఒకటి నవంబర్లో వచ్చే Thanks Giving , డిసెంబర్ లో వచ్చే Christmas. ఈ వరస లోకి దాదాపు అక్టోబర్ లో వచ్చే "దివాలీ" చేరిపోయింది. వైట్ హౌస్లో దీపం వెలిగించటం దగ్గరనుంచీ మా  ఊళ్ళో ఉన్న లైబ్రరీ దాకా అమెరికాలో దీపావళి పండగ చేసుకుంటున్నారు.

చికాగో నుండి ప్లేన్ దిగి ఇంట్లోకి రాగానే రేపు మెన్హాటన్ లో ఒక రేడియో స్టేషన్లో దివాలీ ప్రోగ్రాంకి మనం వెళ్తున్నాము అన్నారు. నేను మెన్హాటన్ వెళ్ళటానికి కొంచెం సంకోచిస్తాను.

అక్కడ ధియేటర్స్ మ్యూజియంస్ అన్నీ బాగుంటాయి కానీ వెళ్ళటానికి  కొన్ని ఇబ్బందులు భరించాల్సి వస్తుంది. చివరికి చేసేది లేక సరే అన్నాను.

సరే అన్నాను కానీ లోపల కొంచెం బెరుకు గానే ఉంది.  జెర్సీ సిటీ,  మెన్హాటన్, హడ్సన్ రివర్ కి ఇరు పక్కలా ఉంటాయి. మెన్హాటన్ కి వెళ్ళాలంటే మేమున్న చోటునుంచి సొరంగం ద్వారా కాలవ దాటటమే. దగ్గరే, మూడు నాలుగు మైళ్ళు ఉంటుంది కానీ ట్రాఫిక్ తో గంట పట్టిన రోజులున్నాయి. సరే దాటాము పో కార్ పార్క్ చెయ్యటం పెద్ద గొడవ. మనం వెళ్ళే చోట దగ్గరలో పార్కింగ్ దొరుకుతుందని చెప్పలేము. సరే పార్క్ చేసి ప్రోగ్రాం కి వెళతాం , రెండు మూడు గంటల ప్రోగ్రాం అయిన తర్వాత ఎదో తినాలి కదా దగ్గరలో సరి అయిన రెస్టారెంట్ ఉంటుందని చెప్పలేము. ఫ్యూషన్ రెస్టారెంట్లు, ఇటాలియన్ రెస్టారెంట్లు , వేగన్ రెస్టారెంట్లు ఉంటాయి కానీ  తినగలమో లేదో చెప్పటం కష్టమే. నేను వేగన్ ని కాను ఇటాలియన్ ఫుడ్ తినను థాయ్ ఫ్యూడ్ అసలే నచ్చదు ఫ్యూషన్ ఫుడ్ దగ్గరకి పోను. ఆ రెస్టారెంట్లలో తిని ఇంటికొచ్చి తిట్లూ శాపనార్ధాలతో మాగాయ ముద్ద కలిపించుకుని తిన్న రోజులు చాలా ఉన్నాయి.

బెరుకుగానే ఇంటినుండి బయలుదేరాను. ఆరోజు వేళా విశేషమేమిటో గానీ వెళ్లాల్సిన ప్రదేశానికి పావు గంటలో జేరుకున్నాము. ఎదురుకుండా పార్కింగ్ దొరికింది. ప్రోగ్రాం ఒక రేడియో స్టేషన్ లో. నేను చిన్నప్పుడు చూసిన బెజవాడ(విజయవాడ) రేడియో స్టేషన్ కి దీనికి చాలా తేడా ఉంది. లోపలికి వెళ్ళి ఒక చిన్న థియేటర్లో కూర్చున్నాము.

 పై ఉన్న ఫోటో మెన్హాటన్ లో ఉన్న WQXR రేడియో స్టేషన్ లో తీసింది. ఆ రోజు దివాలీ సందర్భంగా talent show జరుపు తున్నారు. థియేటర్  దాదాపు నిండి పోయింది, యాభై మంది ఉంటారు. ఆ రోజు కార్యక్రమాన్ని బయటి  ప్రేక్షకుల కోసం streaming చేస్తున్నారు. ఇక్కడ బ్రాడ్వే కి చుట్టుపక్కల, ఇటువంటి చిన్న చిన్న థియేటర్స్ చాలా ఉన్నాయి. బ్రాడ్వే లో ప్రదర్శించటానికి నోచుకోని నాటకాలని ఇటువంటి థియేటర్ల లో ప్రదర్శిస్తూ ఉంటారు. దాదాపు పెద్ద నటులందరూ చిన్న చిన్న నాటకాలు వేసి బ్రాడ్వే లోకి వెళ్ళి పేరు తెచ్చుకున్నవాళ్ళే. మేమూ చిన్నప్పుడు ఎవరో ఒకరింట్లో చిన్న స్టేజి కట్టి నాటకాలు వేసే వాళ్ళం. మేము ఎవరమూ యాక్టర్స్ అవలేదు. ఎవరో నూటికో కోటికో ఒకళ్ళు అవుతారు. కానీ ధీటుగా స్టేజి మీద మాట్లాడటం అలవాటు అవుతుంది.

ప్రోగ్రాం మొదలెట్టారు. ఆరోజు అరుణ్ వేణుగోపాల్( NPR radio) సభ నడుపుతున్నారు. ప్రోగ్రాం ఎల్లా నడుస్తుందో చెప్పి జడ్జెస్ ని పరిచయం చేశారు ( DJ Rekha and comedian Aparna Nancherla). ప్రోగ్రాం అంతా ఇంగ్లిష్ లో జరిగింది. టాలెంట్ షో కాబట్టి సామాన్యంగా బయటి పరిశీలకులు వస్తారు. వాళ్ళకి నచ్చితే  artists ని ఇంకొక చోట బుక్ చేసుకుంటారు. మొత్తం ప్రోగ్రాంలో, ఇద్దరు comedians వాళ్ళ నేర్పు ప్రదర్శించారు , ఒక తమిళ ఆవిడ రాజస్థాన్ folk song పాడింది, ఒకళ్ళు డాన్స్ చేశారు, ఒక డాన్స్ ట్రూప్ భారతంలో ఒక ఘట్టం ప్రదర్శించారు. వీళ్ళు తర్వాత ఎక్కడెక్కడ ప్రదర్శనలు చేయబోతున్నారో కూడా చెప్పారు. ప్రదర్శన అయిపొయింది. జడ్జెస్ ఎవరు గెలిచారో చెప్పారు. ఆర్టిస్టులు అందరూ ప్రేక్షకులలోకి వచ్చి కలిసి పోయి మాట్లాడుతున్నారు. నాకు మాత్రం ధ్యాస అంతా  రాత్రి భోజనం మీద ఉంది.

బయటకు వచ్చాము. వాతావరణం ప్రశాంతంగా ఉంది. మృదువుగా వీస్తున్న చక్కటి గాలి. అప్పనంగా వచ్చిన పార్కింగ్ ని వదలలేక, చుట్టుపక్కల ఏమన్నా రెస్టారెంట్స్ ఉన్నాయేమో అని కొంత దూరం అటుపక్కా ఇటుపక్కా తిరిగి చూశాము. తాగి తందానాలేసేవి తప్ప కూర్చుని తినేవి చూడలేదు. ఫోన్ లో వెదికితే  కొంత దూరం లో ఒక diner కనపడింది. వెతకాలే గానీ మన అవసరాలకి ఎప్పుడూ ఏదో ఒక కొట్టు New York లో ఎల్లవేళలా తెరిచి ఉంటుంది. అది 24 hour  రెస్టరెంట్ , అదృష్టం బాగుండి  మళ్ళా ఎదురుకుండా పార్కింగ్ దొరికింది. ఇక్కడ అమెరికాలో,(గోర్మే రెస్టారంట్ కాకుంటే), భోజనం బాగా పెడతారు. నేను సుబ్బరంగా frittata లాగించేశాను. తృప్తిగా ఇంటికి చేరుకున్నాము.

ఒక వారం తరువాత అక్టోబర్ లో చికాగో వచ్చేశాము. వెంటనే  చికాగో  వింటర్ చవిచూశాము. క్రింది ఫోటో ఓ అక్టోబర్ ఉదయాన కనిపించిన మా ఇంటి పెరటితోట. అక్టోబర్ నెల లో నాకు తెలిసినంతవరకూ ఎప్పుడూ చికాగోలో స్నో పడలేదు. ఏమిటో కాలం మారిపోతోంది.

PS : Talent  Mela లో పాల్గొన్న వారి పేర్లు వ్రాద్దామనుకున్నా గానీ నేను తెచ్చిన ప్రోగ్రాం కాగితం ఎంత వెదికినా కనపడలేదు. ఇంట్లో నేను దాచి పెట్టుకున్న కాగితాలు ఇంట్లో ఉన్న ఇద్దరికీ తెలియకుండా మాయమయి పోతూ ఉంటాయి. ఏమిటో చిత్రం.

155 ఓ బుల్లి కథ -- రోజుకో దోసకాయ నాలుగు చిక్కుళ్ళ కధ

అప్పుడే తెల తెల వారు చుండెను. పక్షులు కిల కిలా రావములు చేయుచుండెను. బయట మలయ మారుతము వీచు చుండెను. నా మనస్సు ప్రశాంతముగ నుండెను. అప్పుడు సమయము చూడగా తెల్లవారు ఝాము నాలుగున్నర గంటలయ్యెను. నిశ్శబ్దముగా కాలకృత్యములు తీర్చుకొని మేడ మీది నుండి దిగి కాఫీ ప్రయత్నములు చేసితిని.

అవి ఆరు నెలల క్రిందటి రోజులు. త్వరలో వేసవి వచ్చునని ఆనందించిన రోజులు. వసంత కాలమూ వేసవి కాలము వచ్చి వెళ్ళిపోయెను. ప్రస్తుతము ఇది అక్టోబర్ నెల. పక్షుల కిలకిలా రావములు లేవు. మలయమారుతములూ లేవు. బయట ఉష్ణోగ్రత రోజురోజుకీ తగ్గిపోవుచుండెను. చెట్ల మీది ఆకుల రంగులు మారు చుండెను. ఇంకొక నెల రోజులలో ఆకులు అన్నియూ రాలి   నేలమీద పడి చెత్త బుట్టల లోకి వెళ్ళును. ఇక త్వరలో చలికాలము వచ్చునని వాటి సూచన. నాకు గ్రాంధిక భాష వచ్చుచుండెను. ఎంతవరకూ సాగునే చూచెదను.

ఉదయము ఆరు గంటలకు లేచుదమనుకుని ఏడున్నర గంటలకు లేచితిని. ఇంట్లో చలిగా ఉండెను. ఇంటిలోకి వేడి గాలి పంపే కొలిమిని (furnace ) ని మొదలెడుదామనుకుంటిని గానీ భార్యాగారికి అది చేసే శబ్దము నిద్రాభంగము కలుగునని భయపడి వణుకుచూ  కాఫీ ప్రయత్నములు చేసితిని. ఇంట్లో మొదట లేచి కాఫీ ప్రయత్నములు చేయునది నేనే. నాకూ ఇది సమ్మతమే. ఉదయమున కనీసము రెండు గంటలు ఎవరి ప్రకంపనలూ లేకుండగ   కాలము గడపవచ్చును.

వంటశాల (kitchen ) కిటికీ నుండి పెరటిలోకి చూసితిని. బిక్కు బిక్కు మంటూ ఎండి పోవు చున్న మా పెరటి తోట కనపడెను. దానికి ఈ సంవత్సరము సరి అయిన న్యాయము చెయ్యలేదని నా మనస్సులో బాధగా ఉండెను. పది మందికి కూరగాయలు పంచిన తోట ఈ సంవత్సరం కాసిని దోసకాయలు చిక్కుళ్ళతో సరిపెట్ట వలసి వచ్చినది కదా అని మనసులో బాధ వేసినది. పరిస్థుతుల ప్రభావం మార్చలేము కదా. వాతావరణం మనం చెప్పినట్లు వినదు కదా అని సరిపెట్టు కుంటిని గానీ మిత్రులు వారి పెరటి తోట నుండి వంకాయలు,టొమాటోలు, సొరకాయలు, కుకుంబర్, మిరపకాయలు తెచ్చి ఇస్తుంటే "పుండు మీద కారం చల్లినట్లో లేక దేనిమీదో ఆజ్యం పోసినట్లో" ఇంట్లో పరిస్థితి ఉండును. వాతావరణము అందరికీ ఒకటే కదా వారి తోట పెరుగుట ఏల మన తోట పెరగకపోవుట ఏల అనే ఇంటావిడ ప్రశ్నకి నా దగ్గర సమాధానం లేదు. ఏదో నా బాధని వినేవారులేక, మీతో పంచుకుని కొంచెం ఉపశమనం పొందుదమని ఇక్కడ వ్రాయుచుంటిని. నా కెందుకో బాధల్లో వ్రాయుటకు గ్రాంధికము వచ్చును.

అమెరికాలో మేముండే ప్రాంతములో (చికాగో) బయట వాతావరణం వెచ్చ పడుట ఏప్రిల్ నుండీ ప్రారంభమగును. "మే" మొదటి వారములో పెరట్లో మొక్కలు వేయుదురు. అంతకు ముందు వేసిన మొక్కలు బతికి బట్టకట్టవు. ఈ సంవత్సరము కొంచెము బద్దకం, కొంచెం వాతావరణము అనుకూలించక పోవుట వలన  (ఎడతెగని వర్షాలు ) మా పెరట్లో మొక్కలు వెయ్యలేదు. పక్కింట్లో మొక్కలు పెరుగుతుంటే ఇంట్లో గొణుగుడు మొదలయింది. కానీ ఏమి చేయగలను? నేనూ మనిషినే. భర్త అయినంత మాత్రమున నా ఇష్టా ఇష్టములు మానగలనా?  నాకూ ఇష్టాయిష్టములు ఉన్నవి. నేను సూర్యుడు ఉన్న గానీ బయట పని చేయను. నేను చేద్దా మనుకున్నప్పుడు సూర్యుడు ఉండడు. ఈ సంవత్సరం దాదాపు వేసవి యంతయూ ఈ సమస్యతో  కాలము గడిచిపోయెను. మేము మొక్కలు వేయుచోట గడ్డి పెరుగుట మొదలిడెను.

నేను సరేలే ఈ సంవత్సరం పెరటి తోట మర్చి పోదాము అనుకున్నాను. కానీ మా పక్కింటి చిట్టెమ్మ "టామీ" కి మా పెరట్లో మొక్కలు వెయ్యక పోవటం నచ్చలేదు ఆ ప్రదేశంలో గడ్డిపెరగటం అసలు నచ్చలేదు. తాను సహాయం చేస్తానని ఎప్పుడో మా ఇంటావిడకి చెప్పెందిట, ఆవిడ లేనప్పుడు వచ్చి మొక్కలు వేసేచోట కూచుని గడ్డి పీకటం మొదలెట్టింది. నాకు స్వతహాగా ఆడవారు కష్ట పడటం చూడలేని హృదయం గనుక వెంటనే వెళ్ళి నువ్వు కష్టపడద్దమ్మా నాగలి తీసుకు వచ్చి దున్నుతాను నువ్వు నాకు సహాయం చెయ్యి చాలు అనిచెప్పాను. నేను గారేజ్ లోనుండి electrical cultivator (tiller ) తీసుకువచ్చి దున్నితిని. తాను ఎలక్ట్రికల్ వైర్ సంగతి చూసుకుంది. తర్వాత ఎవరి ఇంట్లోకి వాళ్ళం వెళ్లి పోవుట జరిగెను.

మళ్ళా వర్షాలు మొదలయ్యాయి. వర్షములో మొక్కలు వెయ్యలేము కదా. నేను మొక్కలు వేద్దా మనుకున్నప్పుడు సూర్యుడు రావటల్లేదు. సూర్యుడు ఉన్నప్పుడు నాకు తీరిక దొరకటల్లేదు. తీరిక దొరకటానికి మీరేమి వెలగ పెడుతున్నారని మా ఆవిడ అంటుంది గానీ అది నిజం కాదు. ప్రతీ మనిషికీ ఏదో చెయ్యాలనే తపన ఉంటుంది. ఆ తపన తోటి రోజులు గడిచిపోతుంటాయి. అది సాధించాడా అనేది ముఖ్యం కాదు. ఆ కారణము వలన మొక్కలు పెట్టలేదు.

ఇంతలోకే మా బావమరిది, వాళ్ళ అమ్మాయి పార్వతి తో మా యింటికి వస్తున్నారని తెలిసింది. ఈ సంవత్సరం మా పెరటితోట వారితో ఎందుకు ప్రారంభించ కూడదు అనే బ్రహ్మాండమయిన ఆలోచన నాకు వచ్చెను. వాళ్ళు ఒక్కరోజే ఉండుదురు గనుక వారు వచ్చిన వెంటనే తోట ప్రారంభోత్సవం గురించి చెప్పితిని. బయట సూర్యుడు బ్రహ్మాండంగా వెలుగుచుండెను. వారు వెంటనే అంగీకరించి పనిముట్లు తీసుకుని సిద్ధమయితిరి.

మా దగ్గర ఉన్న దోసకాయ గింజలూ చిక్కుడు కాయ గింజలూ తోటలో వేసితిరి. మా ఆవిడ "నేను పని "ఎగ్గొట్టి" వాళ్ళ చేత చేయించానని అంటుంది గానీ అది నిజము కాదు. వాళ్ళకి హస్త వాసి ఉందని నేను గ్రహించి గింజలు నాటించితిని. అందుకనే ఒక వారము రోజుల్లో మొక్కలు బయటకి వచ్చెను.

ఆలాస్యంగా మొక్కలు వెయ్యటం మూలంగా మాకు పంట ఆగస్టు లో గానీ చేతికందలేదు.మొదటి ఫోటో లో ఉన్న దోసకాయ నాలుగు చిక్కుళ్ళతో మొదలుపెట్టి  దాదాపు  దోసకాయతో రోజూ ఏదో చేసుకుని తింటూనే ఉన్నాము (దోసకాయ పప్పు, కూర, పులుసు,  పచ్చడి). ఇంటి చిక్కుడు కాయ, వంకాయ తో కలిపి కూర చేస్తే చాలా బాగుంటుంది. అల్లాగే చిక్కుడు బంగాళాదుంప కూర కూడా బ్రహ్మాండం.

చివరి ఫోటో లో మాకిచ్చిన మా పక్కింటి టామీ పెరటి తోటలో పండించిన మిరపకాయలు. ఆవిడ వాటిని ఓవెన్లో ఎండబెట్టి బ్లెండర్ తో క్రష్ చేసి సంవత్సరానికి పనికొచ్చేలా దాచిపెట్టుకుంటుంది. అమెరికన్లు మన వంటని "స్పైసీ" అని సన్నాయి నొక్కులు నొక్కుతారు గానీ వాళ్ళు crushed red pepper పిజ్జా మీద వేసుకుని రోజుతూ తింటారు.

రమణా, పార్వతీ, పక్కింటి "టామీ" మీరు కల్పించుకోపోతే ఈ సంవత్సరం మా పెరటి తోట ఉండేది కాదు. తోటలో దోసకాయలకీ చిక్కుళ్ళకీ మీకు థాంక్స్ చెప్పాలి.

PS : మధ్య ఫొటోలో  "ఇదిగో ఫోటో తీసుకో" అని ఒక కాగితం పెట్టుంది గమనించారో లేదో. మీరేమీ అనుకోకండి. ఆరోజు నేను మా ఆవిడ మాట్లాడు కోటల్లేదు. "పుస్తకం హస్త భూషణం " లాగా   "మౌనం భర్త భూషణం" అని నేను కొన్ని రోజులు భార్యతో మాట్లాడను.

154 ఓ బుల్లి కథ -- ఆరోగ్యంగా ఉండాలంటే - Part 3

జీవత్వం ఉన్న ప్రతి వ్యక్తికీ గాలి,నీరు,ఆహారం చాలా ముఖ్యం. కాకపోతే ఎవరి ఇష్టాఇష్టాలకి అనుగుణంగా వాటిని మార్చుకుంటూ ఉంటాము. ఉదాహరణకి మనం బ్రతకటానికి కాఫీ త్రాగ వలసిన అవసరం లేదు, సారాయి త్రాగవలసిన అవసరం లేదు, సిగరెట్ పొగ పీల్చ వలసిన అవుసరం లేదు, పంచ భక్ష పరమాన్నాలతో భోజనము చేయవలసిన అవసరం లేదు. ఎందుకంటే వాటికి దూరంగా ఉన్నవాళ్ళు కూడా మనతోపాటు జీవిస్తున్నారు కనుక.

ఏ గాలి పీల్చాలి , ఏ నీరు తాగాలి, ఏ ఆహారం తినాలి అనేవాటిని సామాన్యంగా ప్రభుత్వం నిర్ణయిస్తుంది. ఏమన్నా అవకతవకలు కనిపిస్తే వాటిని పైకెత్తి చూపటం, వాటిని సరిచేయించటం, వినకపోతే శిక్షించటం కూడా వాళ్ళ పనే. అమెరికాలో అయితే ఆ పదార్ధాలని వెంటనే అమ్మకాలలోనుండి తీసివేస్తారు, గాలి లో పోలెన్ ఎక్కువగా ఉంది జాగర్త అని సూచనలు ఇస్తారు, ఈ నీరు కలుషితం తాగొద్దని చెబుతారు.

ఎన్ని జాగర్తలు పాటించినా మనం కొన్ని సార్లు అస్వస్థతకు గురి అవుతాము. కలుషిత వాతావరణం లో పెరిగిన సూక్ష్మ జీవులు (దోమలు, ఈగలు మొదలైనవి) కుట్టి రక్తంలోకి  కల్మషాలు పంపటం మూలంగా, కలుషిత ఆహార పదార్ధాలు తినటం తాగటం వలన, కలుషిత మందులు వేసుకోవటం (మొన్ననే Zantac / Ranitidine గురుంచి వార్త),శరీర తత్వం  Lactose intolerant, allergy, virus వగైరా, కారణం ఏ వయినా కావచ్చు.డాక్టర్ దగ్గరకు వెళ్తాము మందులిస్తారు తగ్గితే మంచిది లేకపోతే ఆయన మనమీద అలా practice చేస్తూనే ఉంటారు.

మనం అనుకోకుండా మన తృప్తి కోసం, రుచి కోసం ఆగలేక ఇష్టపడి తిన్నవాటితో కూడా మనకి అనారోగ్యం కలగ వచ్చు. దీనికి కారణం "రుచి" అని మనము ఆనందించే ప్రక్రియ మన మనస్సుకి అందే రెండు సంకేతాల కలయిక,మన నాలిక మీద "taste buds " నుండి వచ్చే సంకేతాలు, మన ముక్కు నుండి వచ్చే వాసనల సంకేతాలు. శాస్త్రజ్ఞులు మనం ఆనందించే  పదార్ధపు "రుచి" అనే అనుభవం 85% దాని  "వాసన"  మీద ఆధార పడి ఉంటుందని కూడా తేల్చారు.

దీనిమూలాన  "flavorists " అనే వాళ్ళు పుట్టుకు వచ్చారు. వాళ్ళు చేసేపని పరిశోధన శాలలో కూర్చొని రసాయనాలు కలిపి మనకు ఇష్టమయిన వాసనలు తయారు చెయ్యటం. వాటిని తిండి పదార్ధాల మీద ప్రయోగించటం. ఉదాహరణకి పొటాటో చిప్స్ అన్ని flavors లో రావటానికి కారణం అదే (అమెరికాలో కనీసం మామూలు షాపుల్లో పది రకాల పొటాటో చిప్స్ ఉంటాయి). వచ్చిన గొడవేమిటంటే అన్ని flavors (chemicals ) మన దేహానికి సరిపోతయ్యని చెప్పలేము. తింటే అనారోగ్యానికి కారణం అవ్వచ్చు.

ఇప్పుడు ఎక్కడ చూసినా దేనిలో చూసినా additives ఉంటాయి. ప్రతీ దానిలోనూ ingredients ఏమున్నాయో చూసుకుంటూ ఉండాలి. తినటం ఆపలేము కాబట్టి, ఏపదార్ధాలు తింటున్నామో గమనించి అవి తిన్న తర్వాత అనారోగ్యమునకు దారితీస్తే వెంటనే వాటిని తినటం మానెయ్యాలి.  అందరి శరీర తత్వాలు ఒక విధంగానే ఉండవు  కాబట్టి, ఏవి తినాలో ఏవి తిన కూడదో, ఎవరికి వారు తయారు చేసుకోవలసిన ప్రణాళిక.

మనం ఎంత జాగత్తగా ఉన్నా ఒక్కొక్కప్పుడు అస్వస్థతకి గురి అవుతూ ఉంటాము. అస్వస్థతగా ఉన్నప్పుడు మన శరీరం ఆ అస్వస్థతకు కారణాన్ని గమనించి సరిచెయ్యటానికి ప్రయత్నిస్తుంది. అటువంటి పరిస్థుతులలో దాని పనికి(immunity) అడ్డు రాకుండా తేలికగా అరిగే (శరీరం కష్టపడకుండా అరిగే ) పదార్ధాలని తినాలి. దానినే మా చిన్నప్పుడు అమ్మలూ అమ్మమ్మలు "పథ్యం భోజనం" అనే వారు.

నాకయితే నాకు మా అమ్మలూ అమ్మమ్మలూ నేర్పిన పథ్యం భోజనం -- అన్నంలో, కారప్పొడి, చింతకాయ పచ్చడి, నిమ్మకాయ పచ్చడి, చారు, మజ్జిగ. తినే పరిస్థితిని బట్టి వాటిలో ఏవి తినాలో నిర్ణయించకోటమే. మీరు కూడా మీ శరీరానికి అరుగుదలలో శ్రమ తగ్గించే "పథ్యం" భోజనం  నిర్ణయించుకోండి. ఇది చాలా ముఖ్య మయినది.

Reference:
1. Taste and Digestion (2018), Edited by Joanne Randolph, Enslow Publishing, New York, NY
   
Disclaimer: This article is not intended to provide medical advice, diagnosis or treatment. Consult your doctor for advice. 

153 ఓ బుల్లి కథ ---- పిల్లలూ - పాపలూ

వసుదే వసుతం దేవం 
కంస చారూణ మర్దనం
దేవం పరమా నందం 
కృష్ణం వన్డే జగద్గురుం 

మీకు దేవుడిచ్చిన మంచి కంఠం ఉంది. దానిని చక్కగా ఉపయోగించుకోటానికి సంప్రదాయ మయిన సంగీత శాస్త్రముంది. వాటిని గ్రహించిన తలి తండ్రులు ఉన్నారు. శాస్త్రాన్ని ఓపికగా నేర్పించే నిపుణులైన మాస్టర్లు ఉన్నారు. ఎక్కడో ఇంకో దేశంలో ఉన్నా, పా శ్చాత్య వాతావరణంలో మునిగి తేలుతున్నా, ఇష్టంతో కష్టపడి సాధన చేసే శక్తి మీకుంది. ఇక విని ఆనందించే శక్తి మాకు లేకుండా పోతుందా. మీరు పెద్దయిన తర్వాత తప్పకుండా మీ పిల్లలకు నేర్పుతారు. ఇంక మన ప్రాచీన కర్ణాటక సంగీత ప్రవాహానికి అడ్డం ఏముంటుంది ? మీరంటే మాకు చాలా గర్వంగా ఉంది.

క్రింది వీడియో  Indian Raga Labs (USA ) నుండి వచ్చినది.

The vocal artists are Sahana Prasanna and the Sai sisters (Kiran and Nivi). The accompanying artists include Priyanka Chary on veena, Sumhith Aradhyula on flute, Sashank Sridhar on piano, and Santhosh Ravi on mridangam.

This piece is a thillana, a Carnatic medley between vocal and percussion elements, usually performed with a quick tempo and with gusto.

The title of this thillana is "Tom ta taara" in ragam Sindhubhairavi, set to thalam Deshaadi, and composed by T.K. Govinda Rao. The charanam is in Tamil, and is a tribute to Lord Krishna's dance.

152 ఓ బుల్లి కథ -- ఆరోగ్యంగా ఉండాలంటే - Part 2

మన శరీరమూ, కారు రెండూ ఒక విధంగానే పనిచేస్తాయి. ఇచ్చిన ఆహారం తీసుకుని పీల్చిన గాలితో దగ్ధం చేసి వచ్చిన శక్తి తో ముందరికి కదులుతాయి. కారు ఎక్కడికన్నా వెళ్తున్నప్పుడు మధ్యలో ఆగిపోతుందేమోనని ముందర జాగర్త పడతాము.

కారుకి, ఎల్లప్పుడూ మంచి గాలి అందటానికి Air Filter పెడతాము. దానికి మలినాలు లేకుండా పెట్రోల్ అందటానికి Fuel Filter పెడతాము. కదిలే భాగాలు సులభంగా  కదలటానికి Oil పోస్తాము.ఆ నూనెలో మలినాలు తీసేయ్యటానికి  Oil ఫిల్టర్ పెడతాము. Engine వేడెక్కుతుందని వేడిని తగ్గించటానికి నీళ్ళు పోస్తాము. జాగర్తగా దానికి కావలసిన ఆహారం unleaded, leaded, diesel ఏది కావాలంటే అది ఇస్తాము. వీటి నన్నింటినీ జాగర్తగా చూసుకుంటూ అవసరమైనప్పుడు అరిగిపోయిన పాత వాటిని తీసి వేసి కొత్తవి పెట్టుకుంటూ ఉంటాము.

మన శరీరానికి ఏమి చేస్తున్నాము? ఏది బడితే అది తిని తాగి, కదలలేకపోతే డాక్టర్ దగ్గరకు వెళ్తున్నాము.

ఆలోచిస్తే కారుకీ మనకీ ఒకటే తేడా. ఒకటి physical system ఇంకొకటి biological system. కారు మనం తయారు చేశాం కాబట్టి అది ఎల్లా పనిచేస్తుందో దానికి కావాల్సినవి ఏమిటో తెలుసు. మన శరీరం ఎవరు ఎల్లా చేశారో తెలియదు; మన శరీరం ఎల్లా పనిచేస్తుందో ఇంకా తెలుసుకుంటూనే ఉన్నాము (మన శరీరంలో glymphatic system ఉన్నదని ఈ మధ్యనే కనుగొన్నారు) .

కారు తయారు చేసినవాళ్లు maintenance schedule ఇస్తారు. దాని ప్రకారం దానికి పనులు చేసి కారు కుంటకుండా చూస్తాము. కానీ మన శరీరం ఏ maintenance schedule తో రాలేదు. జీవితం సుఖంగా నడవాలంటే ఒకటే మార్గం; మన శరీరం ఎల్లా పనిచేస్తుందో వీలయినంత వరకూ తెలుసుకుని మనమే ఒక maintenance schedule తయారు చేసుకోవాలి.

ఈ పోస్టుల్లో మన శరీరం ఎల్లా పని చేస్తుందో విపులంగా చూద్దాము. కానీ ముందర ఒకటి గుర్తుంచు కోవాలి. మన శరీరానికి కారుకి కావలసినవి ఒకటే ; పరిశుభ్రమయిన గాలి. పరిశుభ్రమయిన నీళ్ళు. పరిశుభ్రమయిన ఆహారం. ఇవి సరీగ్గా లేకపోతే రెండూ పని చేయవు. కుంటుకుంటూ నడుస్తాయి.ఇది గమనించి సర్దుబాటు చేసుకుంటే  జీవితం బాగుంటుంది లేకపోతే జీవితం మంచానికి అంటుకు పోతుంది.

మొదటగా మనకి పరిశుభ్రమయిన గాలి కావాలి శరీరం గాలిలో oxygen తీసుకుని మలినాలని బయటికి పంపుతుంది. ఇది మనం జీవించటానికి 24 గంటలూ చేస్తున్న పనే. శ్వాస దీర్ఘంగా  ఊపిరితిత్తుల నిండా  పీల్చండి. చిన్న చిన్న సందుల్లోకి కూడా గాలి వెళ్తుంది. కాసేపు ఉంచి వదలండి. ఇది రోజుకు కనీసం పది సార్లు చెయ్యండి.

దీనిని పరిశోధించిన ఒక డాక్టర్ గారు 4,7,8,10 గ చేస్తే బాగుంటుందని అన్నారు. దాని అర్ధం అంకెలు లెక్క పెడుతూ 4 శ్వాస పీల్చటం, 7 అంకెలు బిగపెట్టటం , 8 అంకెలు దానిని వదలటం. ఈ ప్రక్రియని 10 సార్లు చేస్తే శరీరానికి చాలా మంచిది అని Sarah Ballantyne PhD గారు  auto immunity seminar లో చెప్పారు. దీనినే మనవాళ్ళు మెడిటేషన్ అంటారు.  (అంకెలు లెక్కపెట్టటం మనస్సులో చెయ్య వచ్ఛు.)

రెండవది పరిశుభ్రమయిన నీళ్ళు కావాలి. మొదట లేవంగానే రెండు గ్లాసుల నీళ్ళు తాగండి. తరువాత వీలయినప్పుడల్లా తాగుతూ ఉండండి. మన శరీరం 98.6°F (37°C) దగ్గర పనిచేస్తుంది (operating  temperature ). అందుకని కొంచెం గోరువెచ్చటి నీళ్ళు తాగితే కొంచెం మన శరీరానికి సహాయం చేసినట్లు అవుతుంది.

మనం పాల సీసా శుభ్రం చేసేటప్పుడు  ఒక చిన్న బ్రష్ తీసుకుని రుద్ది తరువాత నీళ్ళతో కడుగుతాము. అదే పని మన శరీరానికి చెయ్యొచ్చు. మనము ఆహారంలో పీచు (fiber ) ఎక్కువగా ఉండే పదార్ధాలు  తీసుకుంటే, ఆ పీచు కూడా బ్రష్ లాగా పనిచేసి లోపల శుభ్రం చేస్తుంది. మనము చెయ్యాల్సిన పని అల్లా  పీచు ఎక్కువగా ఉన్న ఆహార పదార్ధాలు తీసుకోవటం. తాగిన నీళ్ళతో మలినాలని బయటకు పంపడం.

పీచులో మళ్ళా రెండు రకాలు ఉన్నాయి. కరిగేది (soluble ) కరగనిది (insoluble ).  "కరగని" పీచు మనం తిన్న ఆహారం ప్రయాణించే మార్గాన్ని శుభ్రంచేసి చెత్తని బయటికి పంపటానికి దోహదం చేస్తుంది. "కరిగే" పీచు రక్తనాళాల లోకి వెళ్ళి వాటిని శుభ్రం చేస్తుంది.

మనలో చాలా మందికి తెలిసిన పీచు పదార్ధాలు ఉన్న ఆహారం , "ఓట్స్" , "సిరి ధాన్యాలు". ఓట్స్ లో పీచు పదార్ధం కరిగేది కరగనిది దాదాపు సమానంగా ఉన్నాయి. సిరిధాన్యాలలో కరిగే పీచు పదార్ధం ఎంత ఉన్నదో నాకు తెలియదు. కనీసం రోజుకి రెండు మూడు స్పూనులు ఓట్స్ , సిరి ధాన్యాలు తినటం వెంటనే ప్రారంభించండి.

రాబోయే పోస్టుల్లో మన శరీరంలో ఉన్న systems అవి పనిచేసే విధానం గురించి విపులంగా చర్చించి మన శరీరానికి maintenance schedule తయారు చేసుకుందాము. 

151 ఓ బుల్లి కథ -- ఆరోగ్యంగా ఉండాలంటే - Part 1

ప్రకృతిలో జీవత్వం ఉన్న ప్రతి జీవికి పుట్టటం గిట్టటం సహజం. జీవించటం అనే ఈ మధ్యకాలంలో మనం ఏవిధంగా ఆరోగ్యంగా ఉండగలమో పరిశీలించే ప్రయత్నమే ఈ వ్యాసాలు. ఆరోగ్యం లేకపోతే మనం చేసేది చాలా తక్కువ.

మనం పుట్టినప్పుడు మనమంటూ స్వతహాగా చేసింది ఏడవటం. అప్పటి నుండీ సమయానికి ఎవరో పెట్టిన తిండి తింటూ, బయట ఊరికే వస్తున్న గాలిని పీలుస్తూ పెరిగాము.దీనిలో కూడా
మనం చేసేది ఏమీ లేదు పెట్టిన నోట్లో ముద్ద నమలడం మాత్రమే.

సూక్ష్మంగా చూస్తే మన శరీరమనే ఈ యంత్రం మనం తీసుకుంటున్న గాలి, ఆహారం నుండి శక్తిని (energy ) తయారు చేసి మనల్ని నడిపిస్తోంది. ఆ ప్రక్రియలో వచ్చే మలినాలని (waste products ) బయటికి పంపుతోంది.

షుమారుగా మనకు తెలిసిన "కారు" అనే యంత్రం కూడా ఈవిధంగానే పనిచేస్తుంది. గాలి, పెట్రోల్ తీసుకుని కదలటానికి శక్తిని తయారు చేసుకుని , waste products, exhaust ద్వారా బయటికి పంపిస్తుంది.

కాకపోతే మనకీ కారుకీ తేడా maintenance instructions. కారు వచ్చినప్పుడు మనింటికి వాటితో వస్తుంది కానీ మనము అల్లా కాదు. మనకి అసలు maintenance instructions లేవు మనకి మనమే తయారు చేసుకోవాలి.

పోనీ మనకు మనం గట్టి సూచనలు చేసుకుందామన్నా, మనందరమూ ఒకే మూసలో నుండి పుట్టలేదు. మనందరి DNA లు వేరు. అందుకని మన అభిరుచులూ అలవాట్లూ వేరు. ఎంత ప్రయత్నించినా ఒకే maintenance instructions కుదరవు.

ఉదాహరణకి చిన్న ఉల్లిపాయ (garlic ) బ్లడ్ ప్రెషర్ తగ్గిస్తుంది చాలా మంచిది అంటారు, అది తిని ఊపిరాడక emergency hospital కి వెళ్లిన వాళ్ళు నాకు తెలుసు అల్లాగే వేరుశెనగ తిని, శనగలు తిని, మునగాకు కారప్పొడి తిని వెళ్లిన వాళ్ళు నాకు తెలుసు.

ఇప్పటికి మీరు గ్రహించే ఉంటారు. మనతో రాని ఈ  maintenance instructions ఎవరికి వారు తయారు చేసుకోవలసినదే. మన అందరి DNA లు ఒకలా ఉండవు. మన రూపురేఖలు ఒకటి కావు. maintenance instructions అందరికీ ఒకలా ఉండవు కానీ ప్రయత్నిద్దాము.

మన శరీరమనే ఈ యంత్రం ఎల్లా పని చేస్తుందో తెలుసుకుని, మన గమ్యానికి ఆరోగ్యంగా చేరటానికి షుమారుగా కావలసిన maintenance instructions ఈ పోస్టుల్లో వ్రాసుకుందాము.

150 ఓ బుల్లి కథ ---- పాత సంగతులు గుర్తుకు వస్తున్నాయి

"నాకు ఇష్టంలేని పాత సంగతులు గుర్తుకు వస్తున్నాయి,ఏమి చేయమంటావు? " అన్న పరమేశానికి ఏమి చెప్పాలో అర్ధం కాలా.

'ఆ ఆలోచనలు వచ్చినప్పుడు బాధగా ఉంటుంది కదూ" అన్నాను.

"పరమేశం మన మనస్సు ఒక కంప్యూటర్ లాంటిది. దానికి మనం వినేది చూసేది చేసేది అన్నీ తెలుసు. కొన్ని గుర్తు పెట్టుకుంటుంది కొన్ని గుర్తుపెట్టుకోదు  " అన్నా.

"మనకు ఇష్టం లేనివే ఎందుకు గుర్తుకు వస్తుంటాయి " అన్నాడు.

" మనం అటువంటి పనులు మళ్ళా చెయ్యకుండా" అన్నాను.

"మనస్సులోకి ఆ ఆలోచనలు రాకుండా ఏమన్నా చేయగలమా" అన్నాడు.

"ఎక్కడో చదివినట్టు గుర్తు. మనస్సు కంప్యూటర్ లాంటిది కాబట్టి, ఆ ఇష్టంలేని ఆలోచనలు వచ్చినప్పుడు డిలీట్ డిలీట్ అను. ఆ ఆలోచనలు మనస్సు నుండి తొలగి పోతాయి."

"మనస్సులో కంప్యూటర్ కి డిలీట్ అంటే తెలుస్తుందా" అన్నాడు.

"ఎందుకు తెలీదు. మనం కీ బోర్డు మీద డిలీట్ బట్టన్ నొక్కుతున్నాము. డిలీట్ అంటే దానికి తెలుసు. Alexa weather అంటే Alexa  weather చెప్పటల్లా, అల్లాగే మనస్సుకి ఒక ముద్దుపేరు పెట్టుకుని పిలిచి డిలీట్ డిలీట్ అను".

"పనిచేస్తుందా" అన్నాడు

"పనిచేస్తే పనిచేస్తుంది లేకపోతే లేదు. పని చెయ్యక పోతే మన ఋషులు చెప్పే మెడిటేషన్ (ధ్యానం) మొదలెట్టు.తప్పకుండా పనిచేస్తుంది."

"అదెందుకు పనిచేస్తుంది?"

"ధ్యానం చేసేటప్పుడు దాని మీదే మనస్సు నిలబెట్టాలి ". "అంటే మనస్సులో ఆలోచినలు అటూ ఇటూ పోకుండా ఒక దాని మీదే నిలబడి ఉంటుంది"

"అయితే"

"సముద్రపు ఒడ్డునున్నావనుకో అలలు వస్తూ హోరు వినిపిస్తుంది ". "ఒక క్షణం అలలు రాకుండా ఉన్నప్పుడు ఉండే ప్రశాంతత నీవు నమ్మలేవు"

"నిజమే"

"మనస్సులో ఆలోచనలు అల్ల కల్లోలంగా అలలు లాగా వస్తూ ఉంటాయి. మనస్సుని ఒకే ఆలోచన (ధ్యానం) మీదే నిలబెట్టావనుకో ఆ ఆలోచినలు నిలిచిపోతాయి"."అదే మనకు కావాల్సింది"

"ధ్యానం చేసే దెల్లాగూ ?"

"పల్లా కొండలరావు గారు వారి బ్లాగ్ పోస్ట్ లో ధ్యానం మీద వారికి నచ్చిన వీడియో పోస్ట్ చేశారు.
http://blog.palleprapancham.in/2019/03/blog-post_19.html
అదే నాకు నచ్చింది కూడా. అదే నేను ఇక్కడ ఇస్తున్నాను. పరమేశం ఆ వీడియో చూసి ధ్యానం ఎల్లా చెయ్యాలో నేర్చుకో".

మన మెదడు లో ఉన్న కంప్యూటర్ గురించి Waldon Melanie వ్రాసిన పుస్తకం నుండి ముఖ్య విషయాలు ఈ క్రింద ఇస్తున్నాను:
The following information about brain is taken from the book:

Your Brain Understanding with numbers (2014)
Waldron, Melanie
Raintree, Chicago Illinois, USA

Remember, Your one amazing brain:

1. Has about 100 billion brain cells and is 75 per cent water.

2. Stores about 100,000 gigabytes worth of memories

3. Uses 20 per cent of your energy

4. Is connected to around 93,000 miles (150,000 kilometers) of nerves in your body

5. Sends messages around your body at upto 270 miles(435 kilometers) per hour

6. Sees, hears, smells, tastes, and feels for you

7. Keeps your heart pumping and your lungs breathing

8. Rests while you sleep.

149 ఓ బుల్లి కథ ---- మా ఊళ్ళో "Polar Vortex"

లేక్ మిచిగన్ --చికాగో 

                                       
అమెరికాలో కొన్ని రాష్ట్రాలలో చలికాలం ఎప్పుడూ స్నో పడుతూ చలిగా ఉంటుంది. ఇది మామూలే. చలికాలమైనా సామాన్యంగా అన్ని పనులూ సక్రమంగా జరిగిపోతూ ఉంటాయి. కానీ కొన్ని సంవత్సరాలు చల్లగాలులు నార్త్ పోల్ నుండి వీచి జీవితాన్ని అస్త వ్యస్తం చేస్తాయి. కాకపోతే ఎప్పుడు వస్తాయో ముందరే తెలుస్తుంది. కాబట్టి ముందర జాగర్త పడటానికి వీలుంటుంది. బుధవారం చలిగాలులు (Polar Vortex ) వస్తాయని చాలా రోజులబట్టీ చెబుతున్నారు. చాలా తీవ్రంగా ఉంటాయని కూడా చెబుతున్నారు.

బుధవారం గాలులు వస్తున్నాయంటే ముందు రోజులనుండీ స్నో పడుతూ ఉష్ణోగ్రత తగ్గి పోతూ ఉంటుంది. ఒక వారానికి ఇంటికి కావాలసిన కూరగాయలూ అవీ మొన్న ఆదివారం కొనుక్కున్నాము.మంచిదయింది. ఆదివారం నుండీ స్నో పడటం మొదలయితే, మూడు సార్లు స్నో తీయవలసి వచ్చింది. స్నో తీయకపోతే గారేజ్ లోనుండి కారు తియ్యలేము ఎక్కడికీ వెళ్ళటానికీ వీలుండదు. మేము ఒకళ్ళని పెట్టుకున్నాము. వాళ్ళు వచ్చి తీసి వెళ్తారు. బయట వీధుల్లో మునిసిపాలిటీ వాళ్ళు వచ్చి స్నో తీస్తారు. అందుకనే ఇంటావిడ మంగళవారం పనికి వెళ్ళటానికి వీలయింది. ఆవిడ దగ్గరలో లైబ్రరీ లో పనిచేస్తుంది. ఇక్కడ ప్రతీ లైబ్రరీలో కంప్యూటర్ లు ఉంటాయి. మనం ఉపయోగించు కోవచ్చు. ఉపయోగించటం కష్టమయితే ఈవిడ సలహాలు ఇచ్చి సులభతరం చేస్తుంది.

మేము ఆదివారం నుండీ బుధవారం వచ్చే చలిగాలులు ఎదుర్కోటానికి ఇంట్లో సన్నాహాలు చేస్తున్నాము. కరెంటు పోవచ్చు, ఫ్లాష్ లైట్లు దగ్గర పెట్టుకున్నాము. పైపుల్లో నీళ్లు గడ్డకట్టుకు పోవచ్చు. ఇంట్లో పైపుల్లో నుండి ఎప్పుడూ సన్నగా కారుతూ ఉండేటట్టు చూసుకున్నాము. ఇల్లా చేసుకుంటే పైపుల్లో నీళ్ళు గడ్డకట్టవు. కొన్ని ఏళ్ళ క్రిందట వేడి నీళ్ళ పైపు లో నీళ్ళు గడ్డకట్టుకు పోయాయి. అదొక నరకం. మా అదృష్టం బాగుండి అది వేడి నీళ్ళ పైపు అయింది, చన్నీళ్ళు పట్టుకుని కాచుకుని స్నానాలు చేశాము. ఇంట్లో వేడి గాలులు వచ్ఛే furnace ని కంట్రోల్ చేసే దానికి బ్యాటరీస్ కావాలి అవి కొత్తవి మార్చుకున్నాము. Furnace గ్యాస్ తో పని చేస్తుంది.ఇంట్లో విద్యుత్ తీసుకుని వేడిగాలులు ఇచ్చేవి కూడా ఉన్నాయి.

మంగళవారం నుండీ ఈదురు గాలులు కొట్టటం మొదలెట్టాయి. బయట ఉష్ణోగ్రత పడిపోతోంది. మా ఆవిడ మూడు పొరల దుస్తులు ఒకదాని మీద ఒకటి వేసుకుని ఉద్యోగానికి వెళ్ళింది. ముందరే ఆఫీసులు మూసేస్తే సాయంత్రానికల్లా ఇంటికి వచ్చింది. నేను ప్రతీ బుధవారం మా ఊరి లైబ్రరీలో ఇతర దేశాల నుండి వచ్చిన వాళ్లకి ఇంగ్లిష్ మాట్లాడటం నేర్పుతాను. కానీ ఇవాళ బయట చలిగా ఉందని ఎగగొట్టాను.

బుధవారం పొద్దున చూస్తే బయట ఉష్ణోగ్రత -24F (-31C) (0C దగ్గర నీళ్లు ఐస్ గ మారుతుంది) . కాఫీ తాగి వంట చేసుకుని మధ్యాహ్న భోజనం చేశాము. ఇవాళ స్పెషల్ కూర కాలీఫ్లవర్ + రెడ్ బెల్ పెప్పర్. బయట నర సంచారం లేదు. నేనయితే పడుకుని నిద్రపోయాను. లేచిన తరువాత నాకెందుకో దోశెలు తినాలని పించింది. రెండు దోశెలు తిన్నాను. కాఫీ చేద్దామని ప్రయత్నిస్తే సరీగ్గా రాలేదు. బయట ఎండ బ్రహ్మాండంగా ఉంది. పోస్ట్ వెయ్యాలనిపించి, మా యింటి ముందర, వెనకాల ఫోటోలు తీసి వ్రాయటం మొదలెట్టాను. ఫొటోలు ఇంట్లో నుండే తీశాను. సరయిన బట్టలు లేకుండా బయటికి వెళ్తే వంట్లో ఏ భాగానికి ఆభాగం ఊడి వస్తుంది. ఊళ్ళో నీళ్ళ గొట్టాలు బద్దలయినట్లు, చాలా ఇళ్లల్లో పైపులు ఫ్రీజ్ అయినట్లు వార్తలు వస్తున్నాయి. అన్ని ఆఫీసులకీ ఇవాళ రేపుశలవు లిచ్చారు. ప్లేన్లు కూడా చాలా వరకు నడవటల్లేదు.రైళ్లు వెళ్ళటానికి పట్టాల మీద మంటలు పెట్టారు.సాయంత్రం అయ్యింది. చీకటి పడింది.ఇప్పుడు బయటి ఉష్ణోగ్రత -18F (-28C). రేపటికి ఉష్ణోగ్రత పెరుగుతుంది. శనివారం నాటికి 40F వస్తుందిట. అంటే ఆ రోజు మాకు శీతా కాలంలో వేసవి రోజు.

పైన మొదటి ఫోటో మా ఇంటి ముందరది. రెండవ ఫోటో మా ఇంటి వెనకాలది. వీటిల్లో తెల్లగా కనపడుతున్నది గడ్డకట్టిన స్నో. మధ్యాహ్నం ఎండ బాగా ఉంది. మా చెట్ల నీడలు ఫొటోలో కనపడుతున్నాయి. రోడ్లమీద స్నో తీశారు కానీ పై పొర అతుక్కుని ఉంది. దానిమీద డ్రైవ్ చెయ్యాలంటే గాజు మీద డ్రైవ్ చేసినట్లే. జారుతూ ఉంటుంది. చాలా జాగర్తగా చెయ్యాలి. మూడవ ఫోటో రైళ్లు పట్టాలు తప్పకుండా Switches ఫ్రీజ్ కాకుండా ఉండటానికి మంటలు వేసిన ఫోటో. చివరి ఫోటో చలి లో గడ్డకట్టిన చికాగో లోని లేక్ మిచిగన్.

మేము అమెరికాలో అరోరా అనే ఊళ్ళో ఉంటాము. ఇది చికాగోకు పశ్చిమంగా 35 మైళ్ళ దూరంలో ఉండే చిట్ట చివరి సబర్బ్.

99 ఓ బుల్లి కథ 87 --- ఆర్కిటిక్ వింటర్ లో ఓ రోజు